Kalabradas ClubFígado estofado
Por Cociñeira1, Dom 11 Decembro 2022, na categoría Cociña
Por Cociñeira1, Dom 11 Decembro 2022, na categoría Cociña
fígado de porco fileteado e estofado.
O figado dos animais é un dos alimentos con maior densidade nutritiva. Esta receita pódese facer con calquera tipo de fígado atendendo aos tempos de elaboración xa que, por exemplo, o das aves desfaise moito máis fácil.
Corta o fígado en filetes1 e déixaos macerando nun prato con un chopo de leite, un pouquiño perexil e un dente de allo en láminas.
Pon a quencer unha tixola ampla e baixa, cubre o fondo con aceite de oliva virxe extra e vai engadindo o dente de allo e a cebola picados moi miúdos. Engade tamén o pemento morrón en anacos pequenos. Un minuto a lume forte e ímolo baixando para que se fagan pouco a pouco. Pícalle un pouquiño perexil tamén.
Cando xa empezan a pochar engadimos o allo porro cortado finamente xunto cos cogomelos tamén en láminas finas e as cenorias laminadas2.
Subimos o lume tamén un minuto para axudar a cociñar os últimos elementos. Neste punto engadimos unha pinga de sal e imos facendo lentamente pero non co lume demasiado baixo, para axudar a evaporar a auga. Deixámos que se fagan uns oito ou dez minutos.
Finalmente engades á tixola o tomate picado o máis pequeno que poidas e deixas que se vaia cociñando a lume suave (que non se queime!) remexendo con coidado (non queremos papas!) de vez en cando.
Mentras, podes fritir o fígado.
Noutra tixola pos un bo chorro de aceite de oliva virxe extra e cando está ben quente botas os filetes de fígado poñendo atención en que non se queimen nin que se fagan demasiado, simplemente sellalos polos dous lados.
Ten coidado ao botar o fígado no aceite quente, escúrreo ben antes para non queimarte. Cando vexas que está no punto correcto bótaslle unhas graias de pementa moída e unha pisca de sal (ao gusto). Déixalos uns segundos máis e apagas o lume (déixaos na tixola).
Cando as verduras están prácticamente cociñadas e xa non ten exceso de auga, engadimos os filetes xunto co aceite de fritilos.
Cunha culler de pau e movendo suavemente4 a tixola facemos que se incorporen dentro das verduras para así misturar ben os sabores. Baixamos o lume ata que só fai chup, chup, chup e deixamos que siga cociñando outros vinte minutos, movendo de vez en cando a tixola. Tapamos e deixamos repousar.
podes servir directamente ou ben cocer unhas patacas e botar enriba a preparación.
1 - ou en dados. Eu fíxeno en filetes por ser máis finos e por tanto minimizar a probabilidade de que no interior non esté ben cociñado. Se che gusta a intensidade do sabor do fígado podes experimentar con anacos máis grandes ou simplemente marcalos na tixola.
2 - se as cortas en xuliana lévalle máis tempo facerse, así que débelas incorporar xunto ao pemento morrón.
3 - ou unha lata de 200gr. de tomate natural enteiro/en anacos.
4 - para que non se desfagan.