Andaina Camiño das Leiteiras, Carnota.

Por kabra, Lun 18 Abril 2022, na categoría Natureza

andaina, andar, camiñar, carnota, fotografía, leiteiras, paseo

fotografías que ilustran o paseo en grupo que fixemos na mañán do Sábado Santo en Carnota(gl,es,en)

alto Porta Ventosa

cartel indicador no paso Porta Ventosa, punto máis alto da ruta

Aquí podes descargar o ficheiro .gpx coa ruta realizada (de carnotaetua, wikiloc).

Desde a mesma porta da Casa do Concello saímos costa arriba en dirección ao pabellón deportivo, onde atopamos un panel informativo sobre a ruta e accedemos ao camiño propiamente dito.

comezo da ruta

panel informativo da ruta ao comezo da andaina

No contexto da edición 2022 do VíndemoVer fixemos este paseo conxunto (andaina) nunha mañán luminosa e temperatura suave de primavera.

Días antes, lera este artigo nun blog para obter un pouco de contexto sobre o lugar que iamos visitar, que polo seu nome xa se pode imaxinar un quen facía ese camiño para gañar o pan.

imaxe de ruth matilda anderson

Leiteiras no camiño a Muros. Fotografía de Ruth Matilda Anderson, 1924

Todo o camiño é accesible para realizar a pé ou en bicicleta, sen dificultade técnica en ningún caso e realizable por calquera persoa cun mínimo de hábito de andar. Prácticamente toda a subida está baixo o dosel de carballos e acacias (moitas acacias hai!) polo que incluso en días de sol e calor debe ser agradable de facer.

camiño con carballos e acacias

imaxe ilustrativa do tipo de camiño que temos desde Carnota ata o alto

Durante toda a ruta temos sinais indicadores, pero o camiño transcorre de xeito natural cara o paso entre as dúas vertentes do monte e non ten perda.

Na mesma ruta están indicados os desvíos hacia lugares sinalados do Museo Aberto, pero ao pé do mesmo atopamos xa petroglifos como este

a laxe escrita

A Laxe Escrita, petroglifo ao pé do camiño. Imaxe descargada da web do museoaberto.

No alto da ruta.

vista sobre a ría de muros-noia

vista desde o paso de Porta Ventosa, onde aparece a ría de Muros/Noia coa vila de Muros aos nosos pés

Chegados ao punto máis alto da ruta as vistas sobre a ría son fermosas, coa serra do Barbanza en fronte.

Seguindo o camiño chegariamos ata Serres(Muros), completando un camiño de 16km en total que, tendo en conta que habería que volver, excede o sentido que tiña da ruta de hoxe que era lúdica e accesible para tódolos niveis físicos.

mulleres vestidas ao xeito do primeiros do século XX

mulleres vestidas ao xeito de principios do S.XX actuando como lavandeiras

A organización (o concello) deunos unha pequena explicación antes da saída para contextualizar a visita e tamén contribuiron vestindo a varias persoas ao xeito en que se facía no comezo do século XX. No final da ruta, xunto ao lavadoiro, as mulleres cantáronnos algunha das cancións que dalgún xeito amenizaban o traballo de lavar a roupa, igoal que no tempo da sega, ou cos animais. Como sempre, as letras das cancións son retranqueiras e con dobres sentidos 😄 , típicas do saber popular, da cultura e patrimonio inmaterial.

Na web do concello tes información e folletos para descargar e realizar visitas aos lugares do Museo Aberto e aos Roteiros sinalizados.